एजेन्सी – स्पेनिस कप प्रतियोगिता कोपा डेल रे मा ला लिगा टोली बार्सिलोनाले चौथो डिभिजनको टोली बारबास्त्रो विरुद्ध ३-२ को संघर्षपूर्ण जित निकालेको छ । बारबास्त्रोको घरेलु मैदानमा आइतबार भएको खेलमा बार्सिलोनाका लागि फर्मिन लोपेज, राफिन्हा र रोबर्ट लेवान्डोस्कीले समान १ गोल गरेका थिए। खेलको अग्रता बार्सिलोनाले १८औं मिनेटमा लिएको थियो ।
बारबास्त्रोको घरेलु मैदानमा आइतबार भएको खेलमा बार्सिलोनाका लागि फर्मिन लोपेज, राफिन्हा र रोबर्ट लेवान्डोस्कीले समान १ गोल गरेका थिए।
खेलको अग्रता बार्सिलोनाले १८औं मिनेटमा लिएको थियो । राफिन्हाको क्रसमा बक्स भित्र खाली रहेका फर्मिनले गोल गर्दै खेलमा अग्रता दिलाएका थिए ।
दोस्रो गोल बार्सिलोनाले ५१औं मिनेटमा गर्न सफल भयो । जोआओ फेलिक्सको क्रसमा राफिन्हाले फार पोस्टमा गोल गर्दै टोलीको अग्रतालाई दोब्बर पारेका थिए ।
६०औं मिनेटमा बारबास्त्रोले खेलमा गोल फर्कायो । आड्रिया डे मेसाले गोल गर्दै आफ्नो टोलीलाई खेलमा फर्काउने कोसिस गरेका थिए ।
८८औं मिनेटमा लेवान्डोस्कीले पेनाल्टी मार्फत गोल गर्दै खेलको अन्तिम समय बार्सिलोनाका लागि केही सहज बनाएका थिए । जाईमे रेकेसले हातले बल छोएपछि बार्सिलोनाले पेनाल्टी पाएको थियो ।
तर इन्ज्युरी समयमा बारबास्त्रोले पनि पेनाल्टी मार्फत एक गोल फर्काउने अवसर पायो । फर्मिनले क्रेस्पो माथि फाउल गरेपछि बारबास्त्रोले पेनाल्टी पाएको थियो । पेनाल्टीमा मार्क प्राटले गोल गर्दै पुनः आफ्नो टोलीलाई खेलमा फर्काउने प्रयास गरेपनि थप गोल गर्न नसक्दा टोली बाहिरिएको थियो।