पोखरा । स्वास्थ्य तथा जनसंख्या मन्त्री प्रदिप पौडेलले प्रादेशिक आयुर्वेद चिकित्सालय निर्माण स्थलको बिहीबार निरीक्षण गरेका छन् । पोखरा महानगरपालिका वडा नं. २६ को चापाको चौर भन्ने स्थानमा संघ सरकारले प्रादेशिक आयुर्वेद चिकित्सालय निर्माण गर्न लागेको हो ।
एक सय शय्याको चिकित्सालय निर्माणका लागि सरकारले विस्तृत परियोजना प्रतिवेदन (डीपीआर) तयार गरी टेण्डर प्रक्रिया अगाडी बढाउन लागेको छ । यसका लागि चालु आर्थिक वर्षमा १० करोड रुपैयाँ विनियोजन भएको छ ।
जग्गाको निरिक्षणपछि मन्त्री पौडेलले भौगोलिक बनावट र वातावरणका हिसाबले निर्माणस्थल राम्रो रहेको उल्लेख गरे । चिकित्सालयको निर्माणले पार्ने सकरात्मक र नकारात्मक प्रभावका विषयमा तयार गर्ने प्रतिवेदन छुटेकोमा त्यो पनि पुरा भएको उनले बताए ।
मन्त्री पौडेलले राष्ट्रिय योजना आयोगमा योजनाका लागि पठाउँदा प्रारम्भिक वातावरणीय प्रभाव मुल्यांकन प्रतिवेदन छुट भएको पाएपछि त्यसलाई पनि टेण्डर प्रक्रियाद्धारा सेवाप्रदायक संस्था छनौट गरी तयार गरिएको जानकारी दिए । मन्त्री पौडेलले विनियोजन भएको १० करोड रुपैयाँ अर्थ मन्त्रालयले स्रोत सुनिश्चित गरेलगत्तै सम्पूर्ण प्रक्रिया पूरा गरी निर्माणको बोलपत्र आव्हान् गरिने उल्लेख गरे ।
एक सय शय्या चिकित्सालय निर्माणका लागि स्थानीय समुदायसँग सहकार्य गरी २५ रोपनी जग्गा उपलब्ध गराइएको पोखरा-२६ का वडाध्यक्ष नरेन्द्र थापाले बताए । थप १० रोपनी जग्गाका लागि सुनिश्चितता गरिएको उनले सुनाए ।
यसअघि २५ शय्याको चिकित्सालय निर्माण गर्ने तयारी भएकोमा प्रदेश सरकारले नै संघीय सरकारलाई सय शैयाको चिकित्सालय निर्माणको अनुरोध गरेको थियो । संघीय सरकारले सातै प्रदेशमा एक/एक वटा प्रादेशिक आयुर्वेद चिकित्सालय निर्माण गर्ने निर्णय गरेपछि गण्डकी प्रदेशका लागि उक्त स्थान प्रस्ताव गरिएको थियो । चिकित्सालय निर्माणका लागि ६० करोड रुपैयाँको लागत अनुमान रहेको छ ।
चिकित्सालयमा शिरोधारा, साउना वाथ, स्टीम बाथ, ज्याकुजी, अकुपंचर, नेचुरोप्याथिक, योगलगायत सेवा उपलब्ध हुने गण्डकी आयुर्वेद अस्पतालका प्रमुख डा. शंकर गौतमले जानकारी दिए । पञ्चकर्म सेवाका लागि भिआइपी डिलक्स र डिलक्स गरी पाँचवटा भिल्ला तयार गरिने डा. गौतमले बताए । डिलक्सपछि क्याबिन र साधारण शैया गरेर एकसय पुर्याइने जानकारी दिँदै डा. गौतमले आवासीय रुपमा समेत उपचार सेवा उपलब्ध गराउने गरी चिकित्सालयको डीपीआर तयार गरिएको बताए ।
