पोखरा । आगामी चैत ५ गते हुने भनिएको स्वतन्त्र विद्यार्थी युनियनको निर्वाचन नगर्न जनप्रिय बहुमुखी क्याम्पसमा ३ वटा विद्यार्थी संगठन सक्रिय बनेका छन् ।
समय सकिएपछि पनि संयुक्त प्यानल दर्ता गर्न पाउनुपर्ने माग राखेर नेकपा (माओवादी केन्द्र)निकट अखिल क्रान्तिकारी, नेकपा (एकीकृत समाजवादी)निकट अनेरास्ववियू, विप्लवनिकट अखिल (समाजवादी)ले निर्वाचन अधिकृतको कार्यालय र क्याम्पस प्रमुखको कार्यकक्षमा बुधबार तालाबन्दी गरेका थिए । तीन दिनदेखि निर्वाचन अधिकृत, अनेरास्ववियु र नेविसंघले ताला खोल्न पहल गरेपनि शनिबार साँझसम्म सफल हुन सकेको छैन ।
गत फागुन २७ गते उम्मेदवारी दर्ताको समय थियो । सुरुमा छुट्टाछुट्टै संगठन र उम्मेदवारी दर्ता गरेका तीन संगठनले उम्मेदवारको अन्तिम नामावली प्रकाशनपछि पनि संयुक्त प्यानल दर्ताको माग गरेका थिए । निर्वाचन अधिकृतले पनि यो माग सम्बोधन गर्न नसकिने भनेपछि यी तीन संगठनले तालाबन्दी गरेका थिए ।
ताला खोल्ने विषयमा शनिबार बिहान सबै संगठनसँग निर्वाचन अधिकृतले छलफल गरेका थिए । उक्त छलफलमा पनि सहमति जुट्न सकेन । छलफलमा सहमति नजुटेपछि अनेरास्ववियुले शनिबार साँझ ६ बजे विज्ञप्ती निकालेर क्याम्पसलाई निर्वाचनको वातावरण बनाउन १८ घण्टाको अल्टिमेटम दिएको छ ।
क्याम्पसमा कमजोर उपस्थिति र निर्वाचन हार्ने भएपछि तीन संगठनले लाचारीपन देखाएको अनेरास्ववियुको आरोप छ । आठ वर्षपछि हुन लागेको निर्वाचनमा बाध पुर्याएर सुनौलो अवसरको अपमान गरिएको अनेरास्ववियु क्याम्पस कमिटी संयोजक एवं अनेरास्ववियुबाट स्ववियु अध्यक्ष पदका उम्मेदवार आविष्कार केसीले विज्ञप्तीमा उल्लेख गरेका छन् । शनिबार बिहानको छलफलमा अखिल क्रान्तिकारीका केन्द्रिय सचिवालय सदस्य शरणसिंह विश्वकर्माले हतियार देखाएर निर्वाचन अधिकृत र क्याम्पस प्रशासनलाई धम्क्याएको विज्ञप्तीमा उल्लेख छ ।
