GIF TIGER CUP

स्ववियु चुनाव नगर्ने पक्षमा जनप्रियका अध्यक्ष र क्याम्पस प्रमुख, भाँड्नेकै हितमा निर्णय

पोखरा । जनप्रिय बहुमुखी क्याम्पस पोखराका सञ्चालक समिति अध्यक्ष वीरेन्द्रनारायण बिजुक्छे र क्याम्पस प्रमुख कृष्णबाबु बराल स्ववियु निर्वाचन नै नगर्ने पक्षमा देखिएका छन् । उनी नियमविपरीत गएर माग राख्ने विभिन्न तीन संगठनको पक्षमा उभिएका छन् । कांग्रेसनिकट क्याम्पस प्रमुख बरालले चुनाव नगर्न बखेडा झिक्नेको पक्षमा उभिएर मंगलबार हुनुपर्ने स्ववियुको निर्वाचन अर्को सूचना नआउँदासम्मका लागि स्थगित गरिदिएका छन् ।

गत फागुन २७ मा उम्मेदवारी दर्ताको समय थियो । सुरुमा छुट्टाछुट्टै संगठन र उम्मेदवारी दर्ता गरेका तीन संगठनले उम्मेदवारको अन्तिम नामावली प्रकाशनपछि पनि संयुक्त प्यानल दर्ताको माग गरेका थिए । निर्वाचन अधिकृतले पनि यो माग सम्बोधन गर्न नसकिने भनेपछि यी तीन संगठनले तालाबन्दी गरेका थिए । समय सकिएपछि पनि संयुक्त प्यानल दर्ता गर्न पाउनुपर्ने माग राखेर नेकपा (माओवादी केन्द्र)निकट अखिल (क्रान्तिकारी), नेकपा (एकीकृत समाजवादी)निकट अनेरास्ववियू, विप्लवनिकट अखिल (समाजवादी)ले निर्वाचन अधिकृतको कार्यालय र क्याम्पस प्रमुखको कार्यकक्षमा फागुन २८ मा तालाबन्दी गरेका थिए ।

ताला खोल्ने विषयमा शनिबार बिहान सबै संगठनसँग निर्वाचन समिति र क्याम्पस प्रमुखले छलफल गरेका थिए । उक्त छलफलमा पनि सहमति जुट्न सकेन । छलफलमा सहभागी क्रान्तिकारीका केन्द्रीय सचिवालय सदस्य शरणसिंह विश्वकर्माले बन्दुक नै देखाएर क्याम्पस प्रमुखलाई धम्क्याएको खबर पनि बजारमा व्यापक छ । छातीमा राखेको बन्दुक देखाएर ‘चुनाव कसरी गर्छौ हेरम्ला’ भनेर उनी निस्किएको बताइएको छ । तर, क्रान्तिकारीले भने यो प्रचार गलत भएको खण्डन गरेको छ ।

GIF TIGER CUP

छलफलमा सहमति नजुटेपछि अनेरास्ववियुले शनिबार साँझ ६ बजे विज्ञप्ती निकालेर क्याम्पसलाई निर्वाचनको वातावरण बनाउन १८ घण्टाको अल्टिमेटम दिएको थियाे । तर, क्याम्पस प्रमुखले आइतबार साँझ ५ बजे निर्वाचन नै स्थगित गरिदिएका छन् ।

कास्कीका प्रमुख जिल्ला अधिकारी पनि निर्वाचन गराउने पक्षमै रहेको बुझिएको छ । तर, क्याम्पस प्रमुख बराल कांग्रेसका केही नेताको निर्देशनअनुसार अनेरास्ववियु र क्रान्तिकारीको एउटा पक्षलाई अलग बनाउनुपर्ने रणनीतिमा जुटेको चर्चा छ ।

यो क्याम्पसमा क्रान्तिकारीको प्रभावशाली समूहले अनेरास्ववियुलाई साथ दिएको छ । त्यसैले क्रान्तिकारीको एउटा समूह ‘आफू पनि नबन्ने र अरुलाई पनि बन्न नदिने’ योजनामा छ । जसअनुसार उसले तालाबन्दी गरेर चुनाव नै हुन नदिने अडान लिएको छ ।

नियम विपरीतको मागलाई प्राथमिकता दिएर क्याम्पस प्रमुखले निर्वाचन स्थगित गराएपछि उनको निर्णय क्षमतामा प्रश्न उठेको छ । गत कार्तिक अन्तिममा क्याम्पस प्रमुख बनेका बराललाई चुनाव हुनुपर्ने पक्षमा रहेका अनेरास्ववियु र नेविसंघले भित्रभित्रै असक्षम करार गरेका छन् । नेविसंघका विद्यार्थी नेताले खुलेर भन्न सकेका छैनन् तर क्याम्पस प्रमुखको निर्णयमा उनीहरु पनि खुसी छैनन् ।

अनेरास्ववियु र अनेरास्ववियुबाट अध्यक्ष पदका उम्मेद्वार रहेका आविष्कार केसी जसरी पनि निर्वाचन हुनुपर्ने पक्षमा छ । नेविसंघबाट अध्यक्ष पदका उम्मेद्वार रहेका निर्दोषविक्रम पौडेल पनि चुनाव हुनुपर्ने पक्षमा देखिन्छन् । कांग्रेसभित्र चुनाव हुनुपर्ने र हुन नहुने दुई फरक समूह छ । यही गुटउपगुटको बाँझोमा परेर क्याम्पस प्रमुख बरालले आफूलाई कमजोर प्रस्तुत गरेका छन् । क्याम्पसको सञ्चालक समिति अध्यक्ष कांग्रेसका वीरेन्द्रनारायण बिजुक्छे पनि चुनाव हुन नदिन सक्रिय रहेको बुझिन्छ ।

जनप्रियमा क्रान्तिकारीले सचिव उम्मेद्वार सुदिप बराललाई उठाएको छ । त्यसबाहेकका पदमा उम्मेद्वार छैनन् । क्रान्तिकारीकै उत्सव भुषाल सचिवसहित तीन सदस्य गरेर चार जना अनेरास्ववियुबाट उम्मेद्वार छन् । एक्लै चुनाव लड्नुपर्ने र जित्ने सम्भावना नदेखेपछि क्रान्तिकारीले क्याम्पसमा दोहोरो भूमिका खेलेको छ । एकातिर चुनाव हुन नदिने अडान लिने अनि स्थगित भएपछि निर्वाचन माग गर्ने काम क्रान्तिकारीले गरिरहेको छ ।

अनेरास्ववियुले भन्यो : भ्रष्टाचारको पोल खुल्ने डरले चुनाव रोकियो

स्वतन्त्र विद्यार्थी युनियनको निर्वाचन अन्तिम समयमा स्थगित गरिएपछि अनेरास्ववियुले क्याम्पस प्रमुख कृष्णबाबु बराल र व्यवस्थापन समितिको राजीनामा माग गरेको छ ।

तालाबन्दीका कारण निर्वाचनको वातावरण नबनेको भन्दै निर्वाचन समितिले राजीनामा दिएको थियो र आइतबार क्याम्पस प्रमुखले निर्वाचन स्थगित गरेका थिए । यसपछि अनेरावियुका क्याम्पस कमिटी संयोजक एवं स्ववियु अध्यक्ष पदका उम्मेदवार आविष्कार केसीले निर्वाचन समिति, क्याम्पस प्रमुख र व्यवस्थापन समिति लाचार भएको भन्दै निर्वाचन स्थगित गरिएकोमा आपत्ति जनाएका छन् । ‘मतदाता विद्यार्थीको मताधिकारमाथि खेलबाड गर्ने लाचार तथा असक्षम क्याम्पस प्रमुख र क्याम्पस व्यवस्थापन समितिको तत्काल राजीनामा माग्दछौँ,’ उनले भनेका छन्, ‘हाम्रो मागलाई बेवास्ता गर्ने दुष्प्रयास गरिएको खण्डमा विद्यार्थी हकहित र स्वतन्त्र विद्यार्थी युनियनको निर्वाचनका लागि अनेरास्ववियु कडा प्रतिकारमा उत्रने र आइपर्ने अवस्थाको जिम्मेवारी यही लाचार क्याम्पस प्रशासनले लिनुपर्ने छ ।’

तालाबन्दीलाई मौन समर्थन गर्नु, हातहतियारसहित क्याम्पसभित्र प्रवेश गर्ने केही संगठनका नेताविरुद्ध कानुन एवं प्रशासनिक कदम नचाल्नु र चुनाव सुरु हुनभन्दा २ दिनअघि निर्वाचन प्रक्रिया स्थगन गर्नुमा स्वयं निर्वाचन समिति, क्याम्पस प्रशासन र नियमनकारी क्याम्पस व्यवस्थापन समितिकै मिलेमतो रहेको विज्ञप्तीमा उल्लेख छ । ‘विगत ८ वर्षयता नभएको स्ववियु निर्वाचनलाई अहिले पनि रोकेर क्याम्पस प्रशासनले गरेका लापरबाही र अनियमितता एवं भ्रष्टचारको पोल खुल्ने डरले निर्वाचन सम्पन्न गराउनुपर्ने प्रमुख दायित्वबाट पन्छिएर विद्यार्थी संगठनलाई दोष दिनु, निर्वाचन स्थगित गर्नु झनै लज्जास्पद र शंकास्पद छ,’ विज्ञप्तीमा भनिएको छ ।

Leave A Reply

Your email address will not be published.