पोखरा।
अन्नपूर्ण गाउँपालिकाले पालिका तथा वडा सीमाना हेरफेरको विषयमा सर्वदलीय छलफल सुरु गरेको छ । स्थानीय तहको संरचनालाई समयानुकूल र प्रभावकारी बनाउने उद्देश्यले आयोजित बैठकमा विभिन्न राजनीतिक दलका प्रतिनिधिहरू सहभागी भएका थिए ।
बैठकमा पालिकाको संरचनागत वर्गीकरण, पुनरावलोकन तथा वडा सीमाना निर्धारणका विविध पक्षमा विस्तृत छलफल भएको थियो । सहभागीहरूले स्थानीय आवश्यकता, भौगोलिक विकटता तथा जनसंख्याको वितरणलाई आधार बनाएर सीमाना पुनःनिर्धारण गरिनुपर्ने धारणा राखेका छन् ।
उनीहरूले नागरिकले सहज रूपमा सेवा पाउने वातावरण सिर्जना हुने गरी वडा सीमाना तय गर्नुपर्नेमा जोड दिएका छन् । साथै, सीमाना हेरफेरजस्तो संवेदनशील विषयमा राजनीतिक सहमति, स्थानीय जनताको भावना र तथ्यगत आधारलाई प्राथमिकता दिनुपर्ने सुझाव दिएका छन् ।
गाउँपालिकाका अध्यक्ष विष्णुबहादुर केसीले सीमाना तथा संरचना पुनरावलोकनको सम्पूर्ण प्रक्रिया पारदर्शी र सहभागिता मूलक हुने बताए । उनले सरोकारवाला निकाय, राजनीतिक दल र स्थानीय समुदायसँग आवश्यक समन्वय तथा परामर्श गरेर प्रक्रिया अघि बढाइने स्पष्ट पारे ।
