पोखरा । प्रिमियम मोटरसाइकल ब्रान्ड सीएफमोटोले पोखरामा बिक्री, सर्भिस र स्पेयर पार्ट्ससहितको ३एस (सेल्स, सर्भिस एन्ड स्पेयर पार्ट्स) आउटलेट सञ्चालनमा ल्याएको छ। ऋषि ट्रेड सेन्टर (आरटीसी)को आधिकारिक वितरणमा रहेको सीएफमोटोको नयाँ आउटलेट हिमालय अटो नेक्सस प्रालिले शनिबारदेखि सञ्चालनमा ल्याएको हो।
बुद्धचोकस्थित सोरूम र शिवचोकस्थित सर्भिस सेन्टरको उद्घाटन पोखरा उद्योग वाणिज्य संघकी अध्यक्ष शोभा गौतमले गरिन्। उद्घाटन समारोहमा पश्चिमाञ्चल अटोमोबाइल्स डिलर्स एसोसिएसन (वाडा)का अध्यक्ष दीपेन्द्र कोइराला र पोखरा उद्योग वाणिज्य संघका सदस्य केशव ढकाललगायतको उपस्थिति थियो। उद्घाटनका क्रममा कम्पनीले आठ थान मोटरसाइकल ग्राहकलाई हस्तान्तरण गरेको जनाएको छ।
उद्घाटन अवसरमा सीएफमोटोका मोटरसाइकल खरिद गर्ने ग्राहकलाई २० हजार रुपैयाँसम्म नगद छुट, निःशुल्क हेल्मेट र ह्यान्डगार्ड उपलब्ध गराइएको आरटीसीका महाप्रबन्धक उज्ज्वल जोशीले बताए। २५० ड्युअलमा पाँच वर्षको इन्जिन वारेन्टी तथा फाइनान्समार्फत मोटरसाइकल खरिद गर्दा न्यूनतम ४० प्रतिशत भुक्तानीमा मोटरसाइकल लिन सकिने व्यवस्था गरिएको उनले बताए।
नयाँ आउटलेटबाट सीएफमोटोका मोटरसाइकल बिक्रीसँगै नियमित सर्भिसिङ, प्राविधिक जाँच, जेन्युइन स्पेयर पार्ट्स, टेस्ट राइड तथा बिक्रीपछिको सेवा उपलब्ध हुने कम्पनीले जनाएको छ। पोखरा हुँदै हिमाली तथा उच्च पहाडी क्षेत्रमा मोटरसाइकल यात्रा गर्ने ग्राहकलाई बिक्रीपछिको सेवा र प्राविधिक सहयोग सहज बनाउने उद्देश्यले ३एस आउटलेट सञ्चालनमा ल्याइएको हो।
पोखरा प्रिमियम तथा एड्भेन्चर मोटरसाइकलका लागि विस्तार हुँदै गएको बजार हो। गण्डकीको प्रमुख व्यावसायिक तथा पर्यटन केन्द्रका रूपमा रहेको पोखरा हिमाली तथा उच्च पहाडी गन्तव्यतर्फ जाने मोटरसाइकल यात्राका लागि समेत महत्वपूर्ण प्रवेशद्वार भएकाले यहाँ बिक्रीसँगै सर्भिस र जेन्युइन स्पेयर पार्ट्सको सुविधा आवश्यक देखेर ३एस आउटलेट सञ्चालनमा ल्याइएको आरटीसीका सेल्स हेड विभव कार्कीले बताए।
सीएफमोटोका नेपालमा २५० ड्युअल ईएफआई, ४५० एमटी, ४५० सीएल–सी, ४५० सीएल–सी बोबर र ४५० एसआर–एसलगायत मोडल बिक्री हुँदै आएका छन्। कम्पनीले एड्भेन्चर तथा प्रिमियम मोटरसाइकल सेग्मेन्टमा बजार विस्तार गर्दै आएको जनाएको छ।
पोखरा तथा गण्डकी प्रदेशका ग्राहकलाई बिक्रीसँगै सेवा र प्राविधिक सहयोग उपलब्ध गराउने उद्देश्य रहेको हिमालय अटो नेक्सस प्रालिका सञ्चालक महेश श्रेष्ठले बताए। उक्त सोरूमबाट निकट भविष्यमै जिहो ब्रान्डको इलेक्ट्रिक स्कुटरको बिक्रीसमेत सुरु गर्ने उनले बताए।
कम्पनीले आगामी दिनमा देशका प्रमुख सहरमा बिक्री, सर्भिस र स्पेयर पार्ट्सको नेटवर्क विस्तार गर्ने जनाएको छ।
