पोखरा । खेलकुद विकास मञ्च पोखराको आयोजनामा दोस्रो संस्करणको ‘यामबहादुर थापा स्मृति कप’ फुटसल प्रतियोगिता हुने भएको छ । ‘स्वास्थ्यका लागि खेलकुद राष्ट्रको लागि खेलकुद, सम्बन्धको लागि खेलकुद’ भन्ने मूल नाराका साथ मञ्चले दोस्रो संस्करणको फुटसल प्रतियोगिता आयोजना गर्न लागेको हो ।
पोखरा महानगरपालिका वडा नम्बर-१८ बाट प्रतिभावान खेलाडीहरुको विकास गर्ने मञ्चको उदेश्य छ । पैयुम स्पोट्र्स सेन्टर हस्पिटलचोकमा माघ १० र ११ गते हुने प्रतियोगितामा ३० भन्दा बढी टिमको सहभागिता हुने मञ्चका अध्यक्ष विक्रम थापा (म्याक्सवेल) ले जानकारी दिए ।
उनकाअनुसार प्रतियोगिताको विजेतालाई नगद ६० हजार रुपैयाँको साथमा शिल्ड, मेडल र प्रमाणपत्र प्रदान गरिनेछ । दोस्रो हुने टिमलाई ३० हजार रुपैयाँको साथमा शिल्ड, मेडल र प्रमाणपत्र प्रदान गरिने छ । उत्कृष्ट खेलाडी, उत्कृष्ट गोलरक्षक र सर्वाधिक गोलकर्तालाई ट्रफी प्रदान गरिने उनले बताए ।
