पोखरा । गण्डकी प्रदेशमा राजमार्ग सुरक्षा, ट्राफिक व्यवस्थापन र सवारी दुर्घटना न्यूनीकरणबारे अन्तरक्रिया कार्यक्रम बिहीबार पोखरामा सम्पन्न भएको छ। ‘सुरक्षित सडक र सवारी, हामी सबैको जिम्मेवारी’ भन्ने मूल नाराका साथ आयोजना गरिएको कार्यक्रमले ट्राफिक व्यवस्थापनमा देखिएका चुनौतीहरू पहिचान गर्ने र समाधानका उपाय तय गर्ने लक्ष्य राखेको थियो।
कार्यक्रमको आयोजना राजमार्ग सुरक्षा तथा ट्राफिक व्यवस्थापन कार्यालय, गगनगौंडा र जिल्ला ट्राफिक प्रहरी कार्यालय, कास्कीले गरेका थिए। नेपाल पर्यटन बोर्ड, पोखराको सहकार्यमा सम्पन्न यस अन्तरक्रियाले प्रदेशमा ट्राफिक व्यवस्थापन सुधार र सडक सुरक्षा सुनिश्चित गर्न सरोकारवालासँग छलफल गर्ने अवसर प्रदान गर्यो।
कार्यक्रममा जिल्ला ट्राफिक प्रहरी कार्यालय, कास्कीकी प्रमुख प्रहरी निरीक्षक शोभा पाण्डेले कास्की जिल्लामा हालका सवारी दुर्घटना र ट्राफिक व्यवस्थापनको अवस्था प्रस्तुत गरेकी थिइन्। उनले दुर्घटना न्यूनीकरणका चुनौतीहरू र प्रभावकारी समाधानका उपायहरूमा प्रकाश पारेकी थिइन्।
सहभागीहरूले उठाएका प्रश्न र जिज्ञासाहरूलाई राजमार्ग सुरक्षा तथा ट्राफिक व्यवस्थापन कार्यालयका प्रमुख प्रहरी उपरीक्षक दानबहादुर थापा, सडक विभाग र पोखरा महानगरपालिकाका प्रतिनिधिहरूले सम्बोधन गरे। उनीहरूले ट्राफिक व्यवस्थापन सुधार, सडक सुरक्षा योजना र जनचेतना अभिवृद्धि कार्यक्रम सञ्चालनबारे जानकारी दिएका थिए।
कार्यक्रमले नयाँ कार्यदिशा तय गर्नुका साथै स्थानीय स्तरमा ट्राफिक व्यवस्थापन सुधार र दुर्घटना न्यूनीकरणका लागि साझा रणनीति बनाउने अवसर पनि प्रदान गरेको छ। कार्यक्रममा गण्डकी प्रदेशस्तरीय यातायात व्यवसायी, सरोकारवालाहरू, सडक विभाग, पोखरा महानगरपालिका, नागरिक समाज र सञ्चारकर्मीहरूको सहभागिता रहेको थियो।
