पोखरा । रेडियो अन्नपूर्ण ९३.४ मेगाहर्जले मंसिर १८ गते पोखरामा ‘स्मृतिमा झलकमान र नारायण गोपाल साँझ’ आयोजना गर्ने भएको छ। रेडियोको रजत वर्षअन्तर्गत १२ कार्यक्रममध्ये एकका रूपमा तयारी अन्तिम चरणमा पुगेको स्टेसन म्यानेजर सञ्जय कुमार मल्लले बताए। कार्यक्रम झलकमान गन्धर्व सारङ्गी पाठशाला र पोखरा महानगरपालिका–९ को सहकार्यमा आयोजित हुनेछ।
महेन्द्रपुलस्थित फाल्चामा साँझ साढे ४ बजेबाट निःशुल्क हुने कार्यक्रममा सारङ्गीका धुनमार्फत झलकमान गन्धर्व र स्वर सम्राट् नारायण गोपालका लोकप्रिय गीत प्रस्तुत गरिनेछ। पाठशालाका विद्यार्थीहरूले सारङ्गीमा दुवै कलाकारका सिर्जना सुनाउने कार्यक्रम संयोजक राजाराम पौडेलले जानकारी दिए।
महानगर–९ का वडाध्यक्ष दीपेन्द्र मर्सानीले नेपाली संगीतका महत्त्वपूर्ण स्रष्टाको स्मृतिमा हुने कार्यक्रममा स्थानीयको सहभागिताले बेग्लै महत्त्व थपिने विश्वास व्यक्त गरे। उनले वडावासीलाई उपस्थित रहन आग्रह समेत गरे।
कार्यक्रमलाई भव्य बनाउन महानगरका वडा ३, ११ र १२ सहित पोखरा इन्टरनेट, परिचय एडभरटाइजिङ, पालिखे ढाका टोपी, एस.के. साउन्ड, रूपाकोट ज्योति सुनचाँदी पसल, सिटीवान टेलिभिजन र नेवा मिस: पुच: कास्कीको सहयोग रहने छ।
रजत वर्षको अवसरमा रेडियो अन्नपूर्णले यसअघि वृद्धाश्रममा खाद्यान्न तथा लत्ताकपडा वितरण, बहस–मूलक कार्यक्रम, जेनजेड आन्दोलनका समयमा क्षतिग्रस्त कास्की प्रहरी कार्यालयलाई स्टेसनरी सहयोग, विन्ध्यवासिनी मन्दिर परिसर सरसफाइ तथा सारङ्गी पाठशालाका विद्यार्थीलाई राष्ट्रिय पोशाक वितरणजस्ता गतिविधि गरिसकेको छ।
२०५८ वैशाख १२ मा स्थापना भएको रेडियो अन्नपूर्णले २५ वर्षको यात्रामा क्षेत्रीय सञ्चार क्षेत्रमा फरक पहिचान बनाउन सफल मानिन्छ।
