लेखनाथ । लेखनाथ उद्योग वाणिज्य संघले आगामी पुष १८ गतेदेखि माघ १ गतेसम्म २०औ संस्करणको लेखनाथ महोत्सव आयोजना गर्दैछ । महोत्सवकै अवसरमा बिहीबार विद्यालयस्तरीय चित्रकला प्रतियोगिता भएको छ ।
प्रतियोगितामा डायमण्ड मा.वि.की मनिका शाही प्रथम, रिलायन्स पब्लिक स्कुलकी मनिषा गुरुङ द्वितीय, सृर्जना बहिरा माविका सनम गुरुङ तृतीय र विश्वशान्ति माविका सुजल गुरुङ सान्त्वना भए । प्रथम, द्वितीय, तृतीय र सान्त्वना हुनेले क्रमशः नगद ७ हजार, ५ हजार, ४ हजार र ३ हजार रुपैयाँ प्राप्त गर्ने छन् । पुरस्कार महोत्सवको मञ्चबाट प्रदान गरिने विद्यालयस्तरीय कार्यक्रम उप–समिति संयोजक एल.पी ढुंगानाले जानकारी दिए । सबै सहभागीलाई प्रमाणपत्र प्रदान गरिने आयोजकले जनाएको छ ।
लेखनाथ उद्योग वाणिज्य संघको सभाहलमा आयोजित प्रतियोगितामा १२ वटा विद्यालयका २७ जना छात्र–छात्राको सहभागीता थियो । प्रतियोगीलाई पोखराको कृषि र पर्यटनसँग सम्बन्धीत चित्र कोर्न भनिएको थियो । निर्णायकको भूमिकामा सृजनशील कलाकार समूहका अध्यक्ष डिबी गुरुङ, मिलन शेरचन र झविन्द्र गुरुङ थिए ।
यसअघि प्रतियोगिताको उद्घाटन गर्दै लेखनाथ साहित्य प्रतिष्ठानका अध्यक्ष एवं पोखरा प्रज्ञा प्रतिष्ठानका कुलपति पद्मराज ढकालले पोखरा प्रकृतिको सुन्दर सृजना भएको बताउँदै चित्रकला प्रतियोगिताले विद्यार्थीमासृजनात्मक क्षमताको विकास गराउने बताए । लेखनाथ उद्योग वाणिज्य संघका अध्यक्ष विनोद श्रेष्ठले चित्रकला सँगसँगै महोत्सवमा विद्यार्थी लक्षित शैक्षिक प्रर्दशनी, विज्ञान प्रर्दशनी, नृत्य प्रस्तुति हुने जानकारी दिए । विद्यार्थीहरुलाई महोत्सव अवलोकनको लागि विद्यार्थी परिचयपत्रको आधारमा टिकटमा छुटको समेत व्यवस्था गरिएको उनले बताए ।
विद्यालयस्तरीय कार्यक्रम उप–समिति संयोजक एल.पी ढुंगानाको अध्यक्षतामा सम्पन्न कार्यक्रमको सञ्चालन संघकी महासचिव जानुका पराजुलीले गरेकी थिइन् ।
