पोखरा । वन विज्ञान अध्ययन संस्थान, पोखरा क्याम्पसको स्वतन्त्र विद्यार्थी युनियन (स्ववियु)मा अनेरास्ववियु र अखिल (क्रान्तिकारी)को संयुक्त प्यानल विजयी भएको छ ।
अध्यक्षमा अनेरास्ववियुका अभिषेक शर्मा निर्वाचित भएका छन् । शर्माले नेविसंघका उत्तम हुमागाईंलाई ८२ मतले पराजित गरेका हुन् । शर्माले २ सय ३० मत पाउँदा हुमागाईंले १ सय ४८ मत प्राप्त गरे ।
सचिवमा क्रान्तिकारीका गौरव खड्का २ सय २६ मत ल्याएर निर्वाचित भएको निर्वाचन समिति संयोजक डा. रामचन्द्र शर्माले जानकारी दिए । सचिवमा नेविसंघका दिपेन्द्रप्रसाद रौनियारले १ सय ४८ मत प्राप्त गरे ।
कोषाध्यक्षमा अनेरास्ववियुकी प्रतिमा श्रेष्ठले २ सय २४ र नेविसंघकी जानकी गुर्धामीले १ सय ५४ मत पाए । सदस्यमा अनेरास्ववियुका सुनिलसिंह भण्डारी, सिद्धान्त खनाल, अखिल (क्रान्तिकारी)की रिया श्रेष्ठ, प्रकट ढुंगाना र भिभोर शाह विजयी भए ।
यस क्याम्पसमा ४ सय ५० जना मतदाता थिए । मंगलबार भएको निर्वाचनमा ३ सय ८३ मत खसेको थियो ।
