पोखरा । शिक्षा, विज्ञान तथा प्रविधि मन्त्री विद्या भट्टराईले शिक्षा मन्त्रीको हैसियतले कामगर्दा चुक्न परे पद नै छाडिदिने उद्घोष गरेकी छन् ।
आइतबार बिहान गृह जिल्ला कास्कीमा प्रेस चौतारी कास्कीले आयोजना गरेको पत्रकार भेटघाट कार्यक्रममा बोल्दै मन्त्री भट्टराईले आफूलाई काम गर्नकै लागि सरकारमा लगिएको भन्दै उनले काम गर्ने क्रममा कतै चुक्नुपर्ने परिस्थिति आयोभने चुक्नुभन्दा पहिले पद त्याग गर्ने बताएकी हुन् ।
मन्त्री भट्टराईले अफूले नीति, नियम र असल नियतले मुलुक र समग्र शिक्षा क्षेत्रको सुधारका लागि काम गर्ने प्रतिवद्धता जनाइन् । ‘मैले नीति र नियम अनुरुप शिक्षा सुधारका निम्ति असल नियतका साथ काम गर्ने हो ।’ उनले भने, ‘कतै चुक्नुपर्ने परिस्थिति आएछ भने चुक्नु पहिले नै पद छाडनेछु । तर, कतै चुक्ने छैन ।’
अघिल्लो शिक्षामन्त्रीले थालेका राम्रा कामलाई आफूले निरन्तरता दिने बताएकी उनले लोकप्रियतावादी विचारलेमात्र समाजलाई सही ठाउँमा नपुर्याउने तर्फ सचेत गराइन् । ‘मैले अघिल्ला मन्त्री ज्युहरुले गरेका राम्रा कामलाई निरन्तरता दिन्छु । निस्कर्षमै पुर्याउँछु । तर लोकप्रियतावादी विचारले मात्र समाजलाई सही ठाउँमा पुर्याँदैन भन्नेमा म प्रष्ट छु’ उनले भनिन् ।
उनले थपिन्, ‘तर, शिक्षकहरुलाई अनावश्यक लाञ्छना लगाउने, झोले हुन् भन्ने, बेठिक हुन् भन्ने तिनै शिक्षकहरुले विद्यालय धान्नपर्ने कुराले मलाई लाग्छ हामीले खोजेको गुणस्तरीयता पाउन नसकिँदैन। लोकप्रियतावादी विचारले मात्रै समाजलाई नेतृत्व गर्न सक्दैन। हामी लोकप्रिय पनि हुनुपर्छ। व्यवहारिक पनि हुनुपर्छ।’
देशमा केही गर्न सकिन्छ भन्ने भाष्य निर्माण गर्नुपर्ने र त्यसका लागि आफूले काम गर्ने उनको भनाई छ । अहिले अभिभावक र केही जान्ने बुझ्नेले समेत नेपालमा केही हुँदैन । अध्ययन गर्न वा रोजागारी गर्नसमेत बाहिरै जानुपर्छ भनेर देशमा केही हुन्नँ, सकिँदैन भन्ने भाष्य निर्माण गरिएमा दुःख व्यक्त गर्दै उनले यसलाई बदल्नेगरी काम गर्नुपर्ने दायित्व आफू र वर्तमान सरकारमा रहेको उनले सुनाइन् ।
देशमा राम्रा राम्रा समुदायिक विद्यालय पनि रहेको चर्चा गर्र्दै उनले त्यसका सहि प्रचार गर्न नसकिएको धारणा राखिन् । समुदायीक विद्यालयको गुणस्तर सुधारको योजना ल्याइने र निजी विद्यालयलाई पनि नियमन गरिने बताइन् । छिनछिनमा परीक्षा प्रणाली बदलिँदा एसईई दिएका विद्यार्थी मर्कामा परेको स्विकार गर्दै यससम्बन्धि गहिरिएर अध्ययन गरेर स्थिरढंगले परीक्षा मोडेल तय गर्नुपर्नेमा आफूले जोड दिने उनको भनाई छ ।
भट्टराईले विद्यालय शिक्षा ऐन विचाराधीन संसदीय समितिमा छलफल भइरहेकाले छिट्टै टुंगिने बताएकी छन् ।
‘विद्यालय शिक्षा ऐन विचाराधीन छ। संसदमा छलफल चलिराखेको छ। शिक्षकको भूमिका के रहने भन्ने कुराको मापदण्ड त्यसले बनाइसकेको छ,’ उनले भनिन्,’यदि शिक्षकहरू आरोपित हुँदाखेरी हामीसँग छुट्टाछुट्टै ऐनहरू छदैछन्। यी ऐनहरुमार्फत उहाँहरू कारवाहीमा पर्ने आधारहरू अलरेडी छन्। भएका ऐनहरू कार्यान्वयन गर्ने कुरामा सरकार दत्तचित्त भएर लाग्छ।’