पोखरा । उच्च शिक्षालय तथा माध्यमिक शिक्षालय संघ (हिसान) गण्डकीको आयोजनामा हुने तेस्रो प्रदेशस्तरीय हिसान प्लस–टु फुटसल प्रतियोगिताको कास्की छनोट खेल माघ तेस्रो साता हुने भएको छ ।
गण्डकी प्रदेश स्तरीय प्रतियोगिताका लागि कास्की छनौट प्रतियोगिता माघ १६ देखि १९ गतेसम्म हुने आयोजकले जनाएको छ । प्रतियोगितामा कास्कीबाट १२ टिम छनोट हुने छन् ।
हिसान गण्डकीको सदस्य विद्यालयबीच हुने प्रतियोगितामा कक्षा ११ र १२ मा अध्ययनरत विद्यार्थीहरुले सहभागीता जनाउन पाउने छन् । कास्कीबाट १२ र प्रदेशका अन्य जिल्लाबाट ४ गरी १६ टिमले उपाधिका लागि प्रतिस्पर्धा गर्ने प्रतियोगिताको व्यवस्थापन गरिरहेको सबिन मेमोरियल फुटबल क्बलका अध्यक्ष सञ्जय लिगले बताए ।
प्रतियोगिताको विजेताले नगद १ लाख, मेडल, ट्रफी र उपविजेताले नगद ५० हजार, मेडल र ट्रफी प्राप्त गर्ने प्रतियोगिता संयोजक सन्तोष पराजुलीले जानकारी दिए । प्रयितोगितामा एउटा विद्यालयबाट २ टिमले सहभागिता जनाउन पाउने उनले बताए ।
कास्की छनौट पोखरा ४ गैह्रापाटनमा रहेको बी–फिट फुटसलमा हुनेछ । त्यसैगरी प्रदेशस्तरीय प्रतियोगिता भने पोखरा रंगशालामा रहेको बहुउद्देश्यीय कर्भड हलमा हुने संयोजक पराजुलीले बताए । प्रदेशस्तरीय प्रतियोगिता माघ अन्तिम साताबाट सुरु हुनेछ ।
