पोखरा । पोखराको मर्दी खोलाको ड्याममा पौडी खेल्ने क्रममा दुई जना बालकको डुबेर ज्यान गएको छ। मृत्यु हुनेमा १४ वर्षका विशाल परियार र १३ वर्षका विवश परियार छन्, जो माछापुछ्रे गाउँपालिका–६ का हुन्। यो घटना बिहीबार दिउँसो करिब २ बजे भएको हो। मर्दी खोला पोखराको खानेपानीको मुख्य स्रोत हो।
विशालले आफ्ना दुई साथी खोलाले बगाउँदा एक जनालाई बचाए, तर आफू भने डुबेर बाँच्न सकेनन्। प्रत्यक्षदर्शीका अनुसार, गणतन्त्र दिवसको बिदामा ६ जना साथीहरू बल खेल्न भन्दै गाउँबाट तीन किलोमिटर टाढा मर्दी खोलामा पुगेका थिए। गर्मी भएपछि उनीहरू पौडी खेल्न खोलामा पसेका थिए। उनीहरू कक्षा ८ मा पढ्ने विद्यार्थी थिए।
घटना भएलगत्तै सशस्त्र प्रहरीको टोलीले २० फिट गहिरो पानीबाट बालकहरूको शव निकालेको छ। स्थानीयले खानेपानीको मुहानमा क्रसर चलाउँदा पानी फोहोर भएको र पौडी खेल्न रोक नलगाउँदा यस्तो दुर्घटना भएको गुनासो गरेका छन्। उनीहरूले खानेपानी कार्यालय र प्रशासनले यो विषयमा ध्यान नदिएको बताएका छन्।
