पोखरा । भजन, कीर्तन, र ध्यानमार्फत आध्यात्मिक आनन्द र आन्तरिक शान्तिको अनुभव गराउने उदेश्य आयोजित आध्यात्मिक सत्संग अमृतधारा सांगीतिक कार्यक्रम पोखराा सम्पन्न भएको छ।
द आर्ट अफ लिभिङ पोखरा परिवारद्वारा आयोजित र होटल माउण्ट कैलाशको समन्वय, सहकार्यमा सम्पन्न कार्यक्रममा आर्ट अफ लिभिङका वरिष्ठ प्रशिक्षक तथा विश्व–प्रसिद्ध संगीतकार विक्रम हजराले आफ्नो प्रस्तुतीबाट सबैलाई मन्त्रमुग्ध पारेका थिए । उनका भजनहरू विशेषगरी कृष्ण, शिव, देवी र गणेशका भजनहरूको लागि प्रसिद्ध छन्। उनको संगीतले आध्यात्मिकता र आधुनिकतालाई समेटेर एक अनौठो मिश्रण प्रस्तुत गर्दै आएको छ । उनका भजनहरू ‘अच्युतम् केशवम्’, ‘राधे राधे राधे श्याम’, ‘हर हर भोले शंकरा’ जस्ता लोकप्रिय छन् । उनले भजनकै बीचमा नेपाली गीत ‘वारी जमुना पारी जमुना’ गीत गायर सहभागी दर्शक स्रोताको मन जितेका थिए ।
कार्यक्रममा प्रमुख अतिथि कास्की जिल्ला न्यायाधीश हिमलाल बेलबासेले गीत संगीतमा आध्यात्मिक चेतना जगाउने र सत्मार्गमा लाग्न प्रेरणा दिने शक्ति हुने धारणा राखे । उनले पर्यटकीय शहर पोखरामा चर्चित संगितकार, भजन गायक र आध्यात्मिक प्रशिक्षक विक्रम हाजरा उपस्थिती र गायकीको प्रशंसा गरे ।
कार्यक्रम संयोजक तथा गण्डकी प्रदेश संयोजक नरेश भट्टराइले हाजराको प्रस्तुतिमा संगीत र ध्यानको अनौठो संगमले श्रोताहरूलाई गहिरो आध्यात्मिक अनुभव प्रदान गरेको बताए । उनले १५ सय बढीको उपस्थिती रहेको कार्यक्रमले सांस्कृतिक र भौगोलिक सीमानाहरूलाई पार गरी विभिन्न पृष्ठभूमिका मानिसहरूलाई एकताबद्ध गर्दै सकारात्मक ऊर्जा फैलाउन सफल भएको बताए ।
आर्ट अफ लिभिङले विश्वभर यस्ता सत्संगहरू आयोजना गर्दै सामुदायिक भावना र कल्याणलाई प्रोत्साहन गर्दै आएको र पोखराको यो कार्यक्रमले संस्कृति र परम्पराहरूको संरक्षण गर्दै सहभागीहरूलाई खुशी र पूर्ण जीवन जिउन प्रेरित गरेको गण्डकी प्रदेशका प्रशिक्षक सौमाया गुरुङले बताइन । उनका अनुसार सत्संग शब्द संस्कृतका “सत्” (सत्य) र “संग” (संगत) बाट आएको हो, जसको अर्थ “सत्यको संगत” हो ।
सो कार्यक्रममा आर्ट अफ लिभिङका कन्ट्री कोअर्डिनेटर देवीका शाह, भूतपूर्व कन्ट्री कोअर्डिनेटर मिखा माथेमा, टिचर कोअर्डिनेटर राजेश खड्का लगायतको सहभागिता थियो। साथै, नेपालका विभिन्न जिल्लाबाट आएका प्रशिक्षकहरू र भक्तजनहरूको ठूलो संख्यामा उपस्थिति रहेको थियो ।
