सुचना१
हेमाजा हिले महोत्सव

लोमन्थाङमा ‘टप अफ द वर्ल्ड गल्फ क्लासिक’ को चौथो संस्करण हुने

पोखरा  । विश्वकै उच्च स्थानमा आयोजना हुने भनिएको ‘टप अफ द वर्ल्ड गल्फ क्लासिक’को चौथो संस्करण आगामी भदौ २८ र २९ गते लोमन्थाङमा हुने भएको छ। ४७ सय मिटर उचाइमा अवस्थित यो कोर्सलाई विश्वकै अद्वितीय गल्फ मैदानका रूपमा स्थापित गर्ने लक्ष्य आयोजकले लिएका छन्।

आयोजक मुस्ताङ गल्फ कोर्सका प्रबन्ध निर्देशक इन्द्रधारा विष्टले आइतबार पत्रकार सम्मेलनमार्फत प्रतियोगिता बारे जानकारी दिएका हुन्। उनका अनुसार यसपटक नेपालसहित विभिन्न देशका ५५ देखि ६० जना गल्फरले सहभागिता जनाउनेछन्। नेपालका उत्कृष्ट ४ प्रोफेसनल गल्फरबीच छुट्टै प्रतिस्पर्धा हुने र विजेताले क्रमशः ३० हजार, २० हजार र १० हजार रुपैयाँ पुरस्कार पाउने व्यवस्था गरिएको छ। एम्योचर खेलाडीका विजेताले आकर्षक ट्रफी प्राप्त गर्नेछन्।

अघिल्ला संस्करणमा ९ होलमा सीमित खेलाइँदै आएको प्रतियोगिता यसपटक १८ होलमा विस्तार गरिएको छ। ‘होल इन वान’ को विशेष पुरस्कारका रूपमा सजावटसहितको घोडा राखिएको छ, जुन विश्वमै अद्वितीय आकर्षणका रूपमा प्रस्तुत हुने आयोजकले दाबी गरेका छन्। साथै विजेता, उपविजेता, बेस्ट ग्रस, लेडी विजेता, सिनियर विजेता, क्लोजेस्ट टु द पिन, मस्ट बर्डिज र लङ्गेस्ट ड्राइभतर्फ छुट्टाछुट्टै पुरस्कार वितरण गरिने कार्यक्रम छ।

‘टी फर क्लाइमेट’ भन्ने शीर्षकमा यसपटकको प्रतियोगिता आयोजना हुँदैछ। जलवायु संकटतर्फ विश्व समुदायको ध्यानाकर्षण गराउँदै वातावरणीय सचेतना फैलाउने उद्देश्य प्रतियोगितामार्फत प्रवाह गर्न लागिएको आयोजक विष्टले बताए। उनका अनुसार, “मुस्ताङ अहिले जलवायु संकटको प्रत्यक्ष चपेटामा छ। उच्च स्थानमा रहेको यस कोर्समार्फत हामीले विश्वलाई सन्देश दिने प्रयास गरेका हौं।”

प्रतियोगिताको क्रममा ख्यातिप्राप्त लोक, आधुनिक तथा सेलो कलाकारले सांगीतिक प्रस्तुति दिनेछन्। प्रतियोगिता सफल बनाउन सरकारी तथा गैरसरकारी निकायको सहकार्य रहेको छ। लोमन्थाङ गाउँपालिका र गण्डकी प्रदेश सरकार प्रवद्र्धकका रूपमा रहेका छन् भने प्रभु बैंक, सिटी एक्सप्रेस, बाह्रसिंगे बियर, जर्मन बेकरी र सोल्टी पानी लगायतका संस्थाले प्रायोजन गरेका छन्।

आयोजक क्लबले लोमन्थाङ गल्फ कोर्सलाई गिनिज बुक अफ वर्ल्ड रेकर्डमा दर्ता गराउने अभियान समेत अघि बढाएको छ। “संसारमै यति उच्च स्थानमा मनमोहक गल्फ कोर्स अरूत्र छैन। यसलाई विश्वको आकर्षक खेलमैदानका रूपमा स्थापित गर्ने हाम्रो लक्ष्य हो,” विष्टले स्पष्ट पारे।

वडा नं २६
Sadak 1
पुल सेन्टर