पोखरा । पोखरा रंगशालामा जारी यु–१४ विद्यालयस्तरीय फुटबल प्रतियोगिताको छात्रतर्फ लिग चरणका खेल सकिएका छन् । कास्की जिल्ला फुटबल संघको आयोजनामा भदौ १२ गतेदेखि सुरु प्रतियोगितामा छात्रा तर्फ ६ विद्यालय र छात्रतर्फ २४ विद्यालयले सहभागिता जनाएका छन् ।
लिग चरणको नतिजा अनुसार समूह ‘ए’ बाट बालकल्याण मावि लगातार तीन जितसहित ९ अंक जोड्दै समूह विजेता बनेर दोस्रो चरणमा पुगेको छ । सो समूहको दोस्रो स्थान भद्रकालीले एक जित र दुई हारबाट ३ अंक जोड्दै कब्जा गरेको छ । समान अंक भए पनि गोलअन्तरका आधारमा स्नोभ्यू तेस्रो र शान्तिदीप चौथो स्थानमा रहँदै बाहिरिएका छन् ।
समूह ‘बी’ बाट शैनिक आवासीय मावि ९ अंकसहित विजेता बनेको छ भने ४ अंक जोडेको हेम्जा बोर्डिङ दोस्रो चरणमा पुगेको छ । सिर्जना सेकेन्डरी स्कुल ३ अंक र कुम्दिनी होम्स १ अंकमा सीमित रहँदै प्रतियोगिताबाट बाहिरिएका छन् । त्यस्तै समूह ‘सी’ बाट सोसल पब्लिक र फिस्टेल एकेडेमी अगाडि बढ्दा त्रिभुवन मावि र डायमण्ड मावि बाहिरिएका छन् ।
समूह ‘डी’ बाट शिशु कल्याण बोर्डिङ र बालोदयले स्थान बनाउँदा अल्फा र सिद्धिविनायक प्रतियोगिताबाट बाहिरिएका छन् । समूह ‘ई’ बाट गण्डकी र कालिका दोस्रो चरणमा पुगेका छन् भने सगरमाथा र रिलायन्सलाई यात्रा टुंगिएको छ । समूह ‘एफ’ बाट शिशु कल्याण मावि र गुरुकुल अघि बढ्दा बेसलाइन र शान्ति निकुञ्ज लिग चरणमै रोकिएका छन् ।
म्याच कमिस्नर गोपाल थापाका अनुसार मंगलबारदेखि छात्रतर्फको नकआउट चरण सुरु हुनेछ । सोही दिनदेखि छात्रातर्फका खेल पनि सुरु हुने छन् । प्रतियोगिता भदौ २० गतेसम्म सञ्चालन हुने कार्यक्रम छ ।
प्रतियोगितामा छात्रतर्फको विजेताले ५० हजार रुपैयाँ नगदसहित ट्रफी प्राप्त गर्नेछन् भने उपविजेताले २५ हजार पाउनेछन् । छात्रातर्फ विजेताले २० हजार र उपविजेताले १० हजार रुपैयाँसहित ट्रफी पाउने व्यवस्था गरिएको कास्की जिल्ला फुटबल संघले जनाएको छ ।
यस प्रतियोगितालाई बंगलादेशी फुड उत्पादक कम्पनी प्रानले एक लाख रुपैयाँ, सहारा क्लब पोखराले नगद ५० हजार रुपैयाँ सहयोग गरेका छन् । यस्तै एबीज इन्जिनियरिङलगायत विभिन्न संघसंस्थाले समेत सहयोग गरेका छन् । पोखरा महानगरपालिका प्रवद्र्धक तथा प्रदेश खेलकुद परिषद गण्डकी विशेष सहयोगीका रुपमा रहेका छन् ।
