पोखरा । पोखरा महानगरपालिका–२ स्थित बाग्लुङ बसपार्क क्षेत्रमा सञ्चालन भइरहेका खाजाघरहरूमा अनैतिक गतिविधि तथा होहल्ला भइरहेको भन्ने सूचनाका आधारमा प्रहरीले छापा मारेको छ। प्रहरीले विभिन्न खाजाघरका सञ्चालकसहित १९ जनालाई पक्राउ गरेको छ।
जिल्ला प्रहरी कार्यालय कास्की र मातहतका प्रहरी कार्यालयबाट खटिएको टोलीले खाजाघरहरूमा लागूऔषध सेवनकर्ताको अखडा बनाई अशान्ति मच्चाउने, यौनजन्य गतिविधिमा संलग्न हुने जस्ता कार्य भइरहेको पुष्टि भएपछि नियन्त्रणमा लिएको हो। पक्राउ परेकालाई जिल्ला प्रशासन कार्यालय, कास्कीमा पेश गरी सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसुरमा पाँच दिनको म्याद थप गरी अनुसन्धान अघि बढाइएको प्रहरीले जनाएको छ।
पक्राउ पर्नेमा अन्नपूर्ण गाउँपालिका–१०, घान्द्रुकका ३७ वर्षीय प्रकाश गुरुङ (कुमारी खाजाघर), माछापुच्छ्रे गाउँपालिका–५ घर भई पोखरा–२ मा बस्दै आएकी ३३ वर्षीया बिमला मगर (बिमला मगर एन्ड खाजाघर), म्याग्दी घर भई पोखरा–२ बस्ने २४ वर्षीया मनदेवी घर्ती (सफल सचिन खाजाघर) र मादी गाउँपालिका–४ की २३ वर्षीया बेल कुमारी रानाभाट (बेल कुमारी एन्ड खाजाघर) रहेका छन्।
त्यस्तै, मादी गाउँपालिका–११ की ४० वर्षीया मिना कुमारी गुरुङ (सिमा सुकुटी हाउस), पर्वत कुश्मा नगरपालिका–५ की ३५ वर्षीया सरिता परियार (सरिता खाजाघर), म्याग्दी मराङ गाउँपालिका–२ की ३५ वर्षीया मिना सिर्पाली (मिना खाजाघर), काभ्रेपलाञ्चोककी ५० वर्षीया निरु तामाङ (नाम नभएको खाजाघर), अन्नपूर्ण गाउँपालिका–१० की ४२ वर्षीया राधिका नेपाली (मनिसा खाजाघर), मादी गाउँपालिका–९ की ४० वर्षीया टिका माया तामाङ (सृष्टि खाजाघर) र पोखरा–२ की २८ वर्षीया विष्णु किसान (जेनिसा रेस्टुरेन्ट) पनि पक्राउ परेका छन्।
यस्तै, पोखरा–२ कै ३५ वर्षीया आशा मगर (आरभ खाजाघर), ४२ वर्षीया माया कार्की (गिभिर खाजाघर), ३५ वर्षीया मनकुमारी किसान (नाम नभएको खाजाघर), ४९ वर्षीया मञ्जु लामा (हिम फ्रेस खाजाघर), ४४ वर्षीया लक्ष्मी विक (दीपक खाजाघर), ३७ वर्षीया आशा तामाङ (पोखरेली कान्छी खाजाघर), ३१ वर्षीय सुवास दर्जी (बाग्लुङ कालिका खाजाघर) र ४५ वर्षीया सिता परियार (अञ्जु मञ्जु खाजाघर) समेत पक्राउ परेका छन्।
प्रहरीका अनुसार पक्राउ परेका सबैमाथि थप अनुसन्धान भइरहेको छ। प्रहरीले पछिल्लो समय बसपार्क क्षेत्रलाई लागूऔषध प्रयोग, होहल्ला र अनैतिक गतिविधिको केन्द्र बनाउने प्रयास बढेको भन्दै निगरानी कडा पारेको जनाएको छ।
