पोखरा । सामसुङको आधिकारिक ब्रान्डेड शो–रूम अब पोखराको न्युरोडमा सञ्चालनमा आएको छ । आइतबार पाल्पा हाउसमा रहेको नयाँ प्लाजाको उद्घाटन नेपालका लागि सामसुङको आधिकारिक वितरक हिम इलेक्ट्रोनिक्सकी निर्देशक सीमा गोल्छाले गरिन्।
यसअघि महेन्द्रपुलमा रहेको सामसुङ प्लाजाले न्युरोडमार्फत सेवा विस्तार गरेको हो। नागार्जुन ट्रेडिङ हाउसका प्रोपाइटर जनपुकार मुनकर्मीका अनुसार नयाँ प्लाजा पश्चिम नेपालको सबैभन्दा ठूलो सामसुङ प्लाजा हो। उनका अनुसार स्मार्टफोन, टिभी, फ्रिज, वासिङ मेसिन, ओभन, एसी, फ्यानसहित सामसुङका सबै उत्पादन एउटै छानामुनि उपलब्ध छन्।
मुनकर्मीले नयाँ स्थानमा ग्राहकको चापलाई ध्यानमा राख्दै सेवा सारिएको बताए। उनका अनुसार उद्घाटन अवसरमा न्युनतम ४ देखि अधिकतम ३५ प्रतिशतसम्म छुटको व्यवस्था गरिएको छ। साथै दशैं–तिहार अफर समेत सुरु भएको छ। उनले सामसुङका टिभी, फ्रिज र वासिङ मेसिन ३० प्रतिशत डाउनपेमेन्टमै खरिद गर्न सकिने सुविधा पनि रहेको जानकारी दिए।
व्यवसायसँगै सामाजिक क्षेत्रमा समेत सक्रिय रहेका मुनकर्मी पृथ्वीनारायण क्याम्पसका पूर्व प्राध्यापक र पाल्पाली समाज पोखराका सल्लाहकार समेत हुन्। उनले १३ वर्षअघि नै पोखराको नयाँबजारमा सामसुङको एक्सक्लुसिभ शाखा सञ्चालनमा ल्याएका थिए।
आधिकारिक वितरक हिम इलेक्ट्रोनिक्सकी निर्देशक सीमा गोल्छाले हाल देशभर १४ वटा सामसुङ प्लाजा सञ्चालनमा रहेको र काठमाडौँमा अर्को नयाँ शो–रूम खोल्ने तयारी भइरहेको जानकारी दिइन्। उनका अनुसार सामसुङका कुनै पनि सामान खरिद गर्दा निःशुल्क होम डेलिभरी उपलब्ध हुन्छ भने फ्रिज, वासिङ मेसिनजस्ता उपकरणमा २० वर्षसम्मको वारेन्टीको व्यवस्था गरिएको छ।
नयाँ स्थानमा खुलेको सामसुङ प्लाजाबाट पोखरा र पश्चिमाञ्चलका ग्राहकले अब विश्वस्तरका सामसुङ उत्पादन एकै स्थानमा सहजै प्राप्त गर्ने सम्भावना बढेको छ।
