पोखरा । स्वास्थ्य सेवा विभागले २०८०/८१ मा खरिद गरेको म्यामोग्राफी मेसिनमा ठूला अनियमितता भएको पाइएको छ। विभागका तत्कालीन महानिर्देशक डा. संगीता कौशल मिश्रासहित १४ जना कर्मचारी र ठेक्का पाउने कम्पनी Maxim Incorporation Traders Pvt. Ltd. का संचालक सुन्दर भुसालमाथि भ्रष्टाचारको आरोप लागेको छ।
अनुसन्धानले देखाएको छ कि खरिद प्रक्रियामा लागत अनुमान बनाउने चरणदेखि नै मिलेमतो भएको थियो। खरिद सम्झौता अनुसारका १२ वटा प्राविधिक वस्तु मध्ये केवल आंशिक सामान प्राप्त भएको थियो। तर झुट्टा बिल, गलत Post Shipment Inspection रिपोर्ट र गलत दाखिला प्रतिवेदन तयार गरेर पूरा सामान आएको देखाइएको आरोप छ।
लागत अनुमान रु. १२ करोड ७५ लाख रहेकोमा कर र अन्य खर्चसहित रु. १४ करोड ६ लाखको भुक्तानी गरिएको छ। प्रतिवादीहरूले झूट्टा दस्तावेज तयार गरी सरकारी कोषमा गैरकानूनी लाभ लिएको ठहर भएको छ।
अनुसन्धान अनुसार प्रतिवादीहरूले सरकारी कोषमा करिब १४ करोड ६ लाखको हानी पुर्याएका छन्। यस घटनामा सामेल सबै प्रतिवादीहरूलाई भ्रष्टाचार निवारण ऐन, २०५९ अनुसार विशेष अदालत, काठमाडौंमा आरोपपत्र दायर गरिएको छ।
