पोखरा। पोखरा रंगशाला टेनिस सेन्टरमा सोमबारदेखि हुने आइटिएफ वर्ल्ड टेनिस टुर जे३० सर्किट १ र २ का सम्पूर्ण तयारी पूरा भएको कास्की जिल्ला टेनिस संघले जनाएको छ। आइटिएफ जे३० को आठौं संस्करण तयारीका विवरण सार्वजनिक गर्न आइतबार पत्रकार सम्मेलन गरिएको थियो।
संघका सचिव भिष्मराज पौडेलका अनुसार ब्वाइजतर्फ ५५ र गल्र्सतर्फ २५ गरी १६ देशका ८० खेलाडी प्रतिस्पर्धामा उत्रनेछन्। विदेशी खेलाडी, अभिभावक र प्रशिक्षक गरेर करिब दुई सय जनाको आतिथ्य पोखराका लागि अवसरको रूपमा संघले लिएको छ।
प्रतियोगितामा नेपालसहित भारत, चीन, अमेरिका, न्युजिल्याण्ड, ताइवान, बंगलादेश, क्यानाडा, अष्ट्रेलिया, कोरिया, युके, सिङ्गापुर, मलेसिया, श्रीलंका, इजरायल र हङकङका खेलाडी सहभागी छन्। स्थानीय खेलाडीको क्षमतावृद्धिमा प्रतियोगिताले महत्वपूर्ण प्रभाव पार्ने कास्की टेनिसका निवर्तमान अध्यक्ष लोकबहादुर गुरुङले बताए।
१३–१८ वर्ष समूहमा हुने खेलमा ब्वाइज–गल्र्स सिङ्गल्स र डबल्स गरी चार इभेन्ट सञ्चालन हुनेछन्। विजेताले ३० अंक, उपविजेताले १८ अंक, सेमिफाइनलिस्टले ९ अंक, क्वाटरफाइनलिस्टले ५ र आर–१६ ले २ अंक प्राप्त गर्नेछन्। डबल्स विजेताले २५ र उपविजेताले १३ अंक पाउनेछन्।
टुर्नामेन्ट निर्देशक अजय विष्टका अनुसार नेपालका वरियता प्राप्त खेलाडीमा ब्वाइजतर्फ प्रणब मानन्धर, आयुष्मान हजुर घले, सक्षम विक्रम शाह, राजवीर प्रधान र गल्र्सतर्फ सुनिता थापा, शिवाली गुरुङ, स्वस्तिका बिष्टलगायतका खेलाडी छन्। दर्शिल श्रेष्ठ र शास्वत बज्राचार्य वाइल्डकार्डबाट प्रवेश पाएका छन्।
प्रतियोगितामा ताइपेइका टिङ–हो याङ (र्याङ्किङ १०७७) र नेपाल नं.–१ सुनिरा थापा समेत प्रतिस्पर्धा गर्नेछन्।
बिष्टले नयाँ नियम कार्यान्वयनसँगै कोर्टको क्षमता नबढे खेलाडी संख्या घट्न सक्ने बताए। पूर्वाधार विस्तारमा राज्यको ध्यान आवश्यक रहेको उनको भनाइ थियो। प्रतियोगिता सञ्चालनमा करिब १७ लाख ८७ हजार रुपैयाँ खर्च हुने अनुमान छ। कार्यक्रमलाई प्रदेश खेलकुद परिषद, जिल्ला खेलकुद विकास समिति, पोखरा महानगर र नेपाल पर्यटन बोर्ड गण्डकी प्रदेशले सहयोग गरेको संघका उपाध्यक्ष नविन श्रेष्ठले जानकारी दिए।
संयोजक तथा कास्की टेनिस संघ अध्यक्ष राजकुमार गुरुङले आगामी वर्ष जे६० वा जे१०० गर्ने लक्ष्य रहे पनि पूर्वाधार अभाव चुनौती भएको बताए। उनले पोखरालाई खेल पर्यटनको सशक्त केन्द्र बनाउन सबैको सहयोग आवश्यक रहेको उल्लेख गरे।
नेपाल खेलकुद पत्रकार मञ्चका अध्यक्ष एमबी आस्थाले अन्तर्राष्ट्रिय प्रतियोगिताले पोखराको पहिचान मजबुत बनाउने भएकाले समन्वय र सहकार्य अनिवार्य हुने बताए।
