पोखरा । पोखराको अमरसिंह चौरमा जारी १३ औं संस्करणको पोखरा महोत्सवमा रचना रिमालको प्रस्तुतीमा पाखरेलीहरुले भरपुर मनोरञ्जन लिएका छन । महोत्सवको ११ औं दिनमा रचना रिमालको सुगम संगीत प्रस्तुतीमा युवाहरु झुमेका हुन ।
रचनाले प्रीति, फोटो फिरिममा, मिनरल वाटर, चाहान्छु, तिमी त पोखरेली, ढुंगेधारालगायत एक दर्जन बढी गीत प्रस्तुतिमार्फत दर्शकलाई नचाइन्। त्यसैगरी साँझको लाइभ कन्सर्टतर्फ पूर्ण राई एण्ड दाजुभाइको प्रस्तुतिमा युवाहरु झुमे ।
महोत्सव सोमबार सकिँदै छ । महोत्सवमा दर्शकको चापसँगै स्टलमा व्यापार बढ्दो रहेको महोत्सव अर्थ तथा स्टल व्यवस्थापन उपसमिति संयोजक जयराम आचार्यले जानकारी दिए ।
महोत्सवको अन्तिम दिन लोकदोहोरीतर्फ चोलेन्द्र पौडेल, रामजी पौडेल, तुलसा क्षेत्री, ममता तामाङ, इन्द्रा गुरुङ लगायतको प्रस्तुती रहने महोत्सवका कलाकार व्यवस्थापन उपसमिति संयोजक गणेश तिमिल्सिनाले जानकारी दिए । तिमिल्सिनाका अनुसार साँझको लाइभ कन्सर्टतर्फ जेम्सीको प्रस्तुती रहने छ ।
महोत्सवमा आयोजित विद्यालय स्तरिय प्रतियोगिताको समेत सोमबार फाइनल प्रतिस्पर्धा हुनेछ । फाइनलमा सेन्ट मेरिज, कास्की मोडनाइज्ड, बेसलाइन एकेडेमी, विभूति र सरस्वती विद्या सदन लामाचौरबीच प्रतिस्पर्धा हुने प्रतियोगिता संयोजक विष्णुकुमार गुरुङले जानकारी दिए ।
महोत्सवको सोमबार पोखरा महानगरपालिकाका प्रमुख धनराज आचार्यको प्रमुख आतिथ्यतामा दिउँसो ३ बजे समापन गरिने महोत्सव प्रचार प्रसार संयोजक दिनेश सुनारले जानकारी दिए ।
