पोखरा । आगामी असोज ४ गते हुने पुम्दी–भुम्दी दोस्रो पर्वतीय दौड प्रतियोगिता सफल पार्न सहयोगी हातहरू थपिँदै गएका छन् । पोखरा क्लिक प्रा.लि. र पोखरा प्रवद्र्धन केन्द्रको संयुक्त आयोजनामा हुने प्रतियोगितालाई नमस्ते हस्पिटल एण्ड रिसर्च सेन्टर प्रा.लि.ले पनि अस्पताल पार्टनरका रूपमा साथ दिने भएको छ ।
यसअन्तर्गत अस्पतालका मेट्रोन एलिना सिंह र प्रतियोगिता संयोजक दीननाथ बरालबीच सम्झौता भएको छ । सम्झौताअनुसार अस्पतालले प्रतियोगिता अवधिभर स्वास्थ्यकर्मी र एम्बुलेन्स सेवा उपलब्ध गराउनेछ । करिब १४ वर्षदेखि पोखरा मुस्ताङचोक पार्दीमार्गमा अत्याधुनिक सुविधासहित सेवा दिँदै आएको नमस्ते हस्पिटल चौबिसै घण्टा आपतकालीन उपचारसहितका विविध स्वास्थ्य सेवा प्रदान गर्दै आएको छ ।
अनलाइन दर्ता प्रक्रिया सुरु गर्न तलको तस्बिरमा क्लिक गर्न सकिन्छ
विश्व पर्यटन दिवसको अवसर पारेर खेल पर्यटनलाई प्रोत्साहन गर्ने उद्देश्यले गत वर्षको सफलतापछि यो वर्ष पनि प्रतियोगिता हुँदैछ । विश्वशान्ति स्तुपाबाट सुरु भई पुम्दीकोट विशाल महादेव मूर्ति परिक्रमा गरेर पोखरा–२२ वडाकार्यालय हुँदै न्यालडाँडाको कालाबाङ बुद्ध पार्कमा समाप्त हुने दौड करिब ८ किलोमिटरको हुनेछ । प्रतियोगितामा खुला, वडास्तरीय, महिला, यू–१६, भेट्रान्स र पर्यटन गरी छ वटा इभेन्ट रहनेछन् ।
खुलातर्फ प्रथम हुने धावकलाई ५० हजार रुपैयाँ पुरस्कारको व्यवस्था गरिएको छ । दोस्रोदेखि पाँचौँसम्म क्रमशः ३० हजार, १५ हजार, ७ हजार र ३ हजार रुपैयाँ दिइनेछ भने छैटौँदेखि १०औँ स्थानसम्मका धावकलाई जनही १ हजार नगदसहित मेडल र प्रमाणपत्र प्रदान गरिनेछ । यस्तै, वडास्तरीय, महिला र यू–१६ समूहमा प्रथम हुनेले १५ हजार र दोस्रो हुनेले ७ हजार रुपैयाँ पाउनेछन् । भेट्रान र विदेशी धावकलाई पनि जनही १५ हजार रुपैयाँका दरले प्रोत्साहन पुरस्कार दिइनेछ ।
प्रतियोगितामा भाग लिन इच्छुकले भदौ २५ गतेसम्म अनलाइन फाराम भर्नुपर्नेछ । फाराम पोखरा क्लिक डटकममार्फत उपलब्ध छ । गत वर्ष बेलायत र ब्राजिलसहित ७१ पुरुष र ३३ महिलाले अनलाइन फाराम भरेका थिए । प्रतिकूल मौसमका बीचमा ७९ जना धावक सहभागी भएका थिए । खुला समूहमा एपीएफ क्लबका निरोज भट्ट क्षत्रीले उपाधि जितेका थिए ।
यसपटकको प्रतियोगिता भव्य बनाउन विभिन्न संघ–संस्थाले सहयोग गर्ने प्रतिबद्धता जनाएका छन् । विश्व शान्ति स्तुप समिति, पुम्दीकोट कोट विकास समिति, कालाबाङ बुद्धपार्क समिति, गण्डकी प्रदेश युवा तथा खेलकुद मन्त्रालय, पोखरा पर्यटन परिषद्, टान गण्डकी, सहास स्पोर्ट्स नेपाल, अटोवेज प्रा.लि., होटल तथा खाद्य व्यवसायी, स्थानीय क्लबहरू लगायतले सहयोग गरेका छन् ।
नेपाल पर्यटन बोर्ड र पोखरा महानगरपालिकाले प्रतियोगितालाई प्रवद्र्धन गरेका छन् भने प्रदेश खेलकुद परिषद् गण्डकीको समन्वय र पोखरा महानगरपालिका–२२ को सहकार्य रहनेछ । मेडिकल पार्टनरमा नेलम्बो नेपाल, अफिसियल टेलिभिजनमा सिटीवान टेलिभिजन, अफिसियल रेडियोमा रेडियो सफलता र अफिसियल ड्रिङ्किङ वाटरका रूपमा ग्लेज नेचुरल स्प्रिङ वाटर जोडिएका छन् ।
प्रतियोगिता भव्य र सभ्य रूपमा सम्पन्न गर्न करिब १६ लाख ९१ हजार रुपैयाँ खर्च हुने आयोजकले जनाएका छन् । प्रतियोगिताको प्रथम पुरस्कार अन्तर्राष्ट्रिय ख्यातिप्राप्त खेलाडी लेफ्टिनेन्ट कुसाङ गुरुङले प्रायोजन गरेका छन् । माउन्ट किनाबालु अन्तर्राष्ट्रिय क्लाइमाथन तीन पटक लगातार जितेर कीर्तिमान राखेका गुरुङ एभरेष्ट म्याराथनलगायत दर्जनौँ अन्तर्राष्ट्रिय दौडमा नेपालको नाम उजागर गरेका धावक हुन् । यस्तै, तेस्रो पुरस्कार नेलम्बो नेपालले प्रायोजन गरेको छ ।
