पोखरा । पच्चीसौँ आहा रारा पोखरा गोल्ड कप फुटबल प्रतियोगिता माघ २७ देखि फागुन ९ गतेसम्म सञ्चालन हुने भएको छ। एन्फाबाट प्राप्त मिति सहारा क्लब पोखराले आज पत्रकार सम्मेलनमार्फत सार्वजनिक गरेको हो।
प्रतियोगिताका लागि नेपालका प्रमुख क्लबसँगै केही विदेशी टोलीलाई पनि आमन्त्रण गरिएको छ। क्लबका अध्यक्ष केशवबहादुर थापाले जानकारी दिए कि सहभागी क्लबहरूको अन्तिम सूची छिट्टै सार्वजनिक गरिनेछ।
यसपटकको संस्करणमा संरचना, सहयोगी संस्था र तयारीबारे क्लबले विस्तृत जानकारी प्रस्तुत गरेको थियो। प्रतियोगिताको संरक्षकमा पोखरा महानगरपालिका रहनेछ। विशेष सहयोगीका रूपमा राष्ट्रिय खेलकुद परिषद्, गण्डकी प्रदेश खेलकुद परिषद्, कास्की जिल्ला खेलकुद विकास समिति, अखिल नेपाल फुटबल संघ र कास्की जिल्ला फुटबल संघ रहनेछन्। गत वर्षको संस्करणमा उज्बेकिस्तानको ब्ल्याक बुल्स एफसी विजेता बनेको थियो भने नेपाल प्रहरी क्लब उपविजेता थियो।
आहा रारा पोखरा गोल्ड कपले पोखरालाई खेलकुदको माध्यमबाट चिनाउने अवसर दिएको छ। पोखरा महानगरपालिका–९ का वडाध्यक्ष दीपेन्द्र मर्सानीले भने महानगरपालिका फुटबल कार्यक्रमका लागि आवश्यक सहयोग गर्न तयार रहेको छ। मुख्य प्रायोजक हिमश्री फुड्स प्रा.लि. का निर्देशक प्रकाश केसीले प्रतियोगितासँगको सहकार्यलाई निरन्तरता दिने बताएका छन्।
पत्रकार सम्मेलनमा क्लबले कात्तिक १४ मा आयोजना गरिएको ‘सहारा च्यारेटी डिनर नाइट’ को आयव्यय पनि सार्वजनिक गर्यो। कार्यक्रमबाट रु २४ लाख १९ हजार संकलन भएको र रु ६ लाख ७७ हजार खर्चपछि रु १७ लाख ४१ हजार बचत भएको क्लबले जनाएको छ।
उक्त रकम ‘सूर्यबहादुर केसी स्मृति सहारा आवासीय फुटबल एकेडेमी’ मा प्रयोग हुने महासचिव गङ्गाराम पौडेलले बताए। एकेडेमीमा हाल १६ जिल्लाका ३० किशोर आवासीय रूपमा प्रशिक्षण लिइरहेका छन्।
