पोखरा । कान्तिपुर एकेडेमी अफ साइन्स एन्ड टेक्नोलोजी, पोखरा–१० चउथेले वार्षिक स्पोर्ट्स मिट आयोजना गरी विद्यार्थीको प्रतिभा पहिचान र क्षमता विकासमा केन्द्रित वर्षेनी कार्यक्रम सम्पन्न गरेको छ।
विद्यालयले एथलेटिक्सका विभिन्न प्रतिस्पर्धा, मार्च पास तथा सांस्कृतिक प्रस्तुतीकरणमार्फत विद्यार्थीलाई कक्षा कोठाभन्दा बाहिरको सिकाइमा सहभागी गराएको हो।
एन प्याब्सन कास्कीमा आबद्ध विद्यालयले कक्षा ४ देखि १० सम्मका विद्यार्थीका प्रतियोगिता पोखरा रंगशालामा र नर्सरीदेखि कक्षा ३ सम्मका गतिविधि विद्यालयमै सम्पन्न गरेको संस्थापक प्रिन्सिपल तथा एन प्याब्सन कास्कीका उपाध्यक्ष मनकाजी गुरुङले जानकारी दिए।
उनका अनुसार एथलेटिक्सअन्तर्गत दौड, जम्पलगायतका सम्पूर्ण विधा समेटिएको स्पोर्ट्स मिटले विद्यार्थीको आत्मविश्वास र प्रतिस्पर्धात्मक क्षमता बढाउने लक्ष्य राखिएको छ।
कार्यक्रम उद्घाटन गर्दै एन प्याब्सन कास्कीका अध्यक्ष हेमन्त अधिकारीले विद्यार्थीका क्षमता पहिचानका लागि स्पोर्ट्स मिट उपयोगी रहेको बताए। ‘‘पढाइसँगै अतिरिक्त गतिविधिमा निरन्तरता दिन सके विद्यालयको समग्र छवि बलियो बन्छ,’’ उनले भने।
उनका अनुसार कास्कीमा एन प्याब्सनले सञ्चालन गर्दै आएको खेलकुद महोत्सव र वाल–प्रतिभा पहिचान कार्यक्रममा पनि कान्तिपुर एकेडेमीले प्रभावकारी सहभागीता जनाउँदै आएको छ।
विद्यालयका संस्थापक प्रिन्सिपल गुरुङको अध्यक्षतामा सम्पन्न कार्यक्रममा विद्यार्थीहरूका प्रदर्शनले विद्यालयले क्षमता–केन्द्रित शैक्षिक वातावरणलाई महत्व दिएको देखिएको थियो। कार्यक्रमको सञ्चालन शिक्षिका सरस्वती श्रेष्ठले गरेकी थिइन्।
