पोखरा । नेपाली कम्युनिष्ट पार्टीले आइतबार पोखराको मानवअधिकार चोकमा आयोजना गरेको ‘एकता सन्देश सभा’मा पार्टीका वरिष्ठ नेता पुष्पकमल दाहाल ‘प्रचण्ड’, माधवकुमार नेपाल र झलनाथ खनाल उपस्थित थिए। सभामा नेताहरूले पार्टी एकता र आगामी निर्वाचनबारे आफ्नो दृष्टिकोण प्रस्तुत गरे।
पार्टी संयोजक प्रचण्डले वर्तमान सरकार आफैं र सहसंयोजक माधवकुमार नेपालले बनाएको स्पष्ट पारे। उनले भने भदौ २६ गते राति राष्ट्रपतिसँग बसेर प्रधानमन्त्रीको सहमति मैले र माधवजीले टुंग्याएका हौं। सरकारले यसमा ध्यान दिनुपर्छ।उनले आगामी फागुन २१ मा हुने निर्वाचन सुनिश्चित भएको दाबी गर्दै सबैलाई द्विविधामा नबस्न आग्रह गरे।
देश राजनीतिक संकटमा परेको बताउँदै नेताहरूले भ्रष्टाचार र स्वार्थपरक प्रवृत्तिलाई अन्त्य गर्नुपर्ने जोड दिएका छन्। नेकपा एकता र संगठन मजबुत बनाउन एमालेका कास्कीका नेता तथा अन्य बाम नेता सबैलाई पार्टीमा आउन आह्वान गरिएको छ। कार्यक्रममा सहसंयक माधवकुमार नेपालले भने जो अघि बढ्न चाहन्छन्, उनीहरू अघि बढिरहनेछन्, जो पछि हट्न चाहन्छन्, उनीहरू पछि हटिरहनेछन्।
देशको सुरक्षा र स्थायित्व सुनिश्चित गर्न कम्युनिष्टहरूले एकजुट हुनुपर्ने चेतावनी दिइएको छ। विगतका सरकारले जनताका अपेक्षा पूरा नगरेको स्मरण गराउँदै झलनाथ खनालले जेनजी आन्दोलनका मुद्दालाई प्राथमिकता दिनुपर्ने बताए।
नेताहरूले निर्वाचन वातावरण तयार पार्न र देशभर चुनावी उत्साह बढाउन सरकारसँग समन्वय गर्न आग्रह गरे। उनीहरूले पार्टी एकताको उद्देश्य केवल सत्ता र सरकारमा पुग्न नभई देशको स्वाभिमान र जनताको हितलाई सुनिश्चित गर्न रहेको बताए।
सभामा नेताहरूले देशको नीति, सिद्धान्त र सामाजिक उद्देश्यको स्पष्टता पनि प्रस्तुत गरे। प्रचण्ड र माधवकुमार नेपालले भ्रष्टाचार र बेइमानीलाई अन्त्य गर्ने अभियानलाई निरन्तरता दिने प्रतिबद्धता दोहोर्याए।
