पोखरा । नेपाली कम्युनिस्ट पार्टी (नेकपा) ले मानव अधिकार चोकमा आयोजना गरेको एकता सन्देश सभापछि स्थानीय व्यवसायीले विरोध जनाएका छन्। व्यवसायीहरूले सभा स्थल नजिकै सडक कब्जा हुँदा ग्राहक आवागमन प्रभावित भएको, यातायात अवरुद्ध भएको र सुरक्षा वातावरण कमजोर भएको बताएका छन्।
व्यवसायीहरूले “गरि खान देउ, व्यवसाय चल्न देउ” जस्ता नारा र प्लेकार्डसहित विरोध प्रकट गरेका थिए। विरोधका क्रममा केही बेर कार्यकर्ता र व्यवसायीबीच धकेलाधकेल भएको थियो। बाबजुद पनि सभा आयोजना गरिएको थियो। विरोधपछि व्यवसायीहरूले आफ्नो पसल बन्द गरेर प्रमुख जिल्ला अधिकारीसमक्ष ज्ञापन पत्र बुझाएका छन्।
चिप्लेढुंगा देखि सिद्धार्थचोकसम्मको सडक क्षेत्रमा विभिन्न राजनीतिक दल र संघसंस्थालाई सभा सम्मेलन गर्न अनुमति दिने प्रचलन रहेको छ। व्यवसायीहरू यस प्रचलनप्रति असन्तुष्ट छन् र केही वर्षदेखि विरोध गर्दै आएका छन्। विरोधका कारण मानव अधिकार चोक र आसपासका सडक क्षेत्रमा प्रहरी सुरक्षा बढाइएको थियो।
सभा स्थलमा नेकपाका संयोजक पुष्पकमल दाहाल ‘प्रचण्ड’, सहसंयोजक माधवकुमार नेपाल र झलनाथ खनाल लगायत शीर्ष नेतृत्वले सम्बोधन गर्ने कार्यक्रम तय थियो।
व्यवसायी समितिका अध्यक्ष दुर्गा सुनारले भने सडक कब्जा हुँदा व्यवसायमा ठूलो असर परेको छ। लामो समयदेखि प्रशासन र महानगरपालिकालाई ध्यानाकर्षण गराए पनि सुनुवाइ भएन। व्यवसायी नवराज त्रिपाठीले पनि सडकमा सभा आयोजना गर्नेहरूलाई कारबाही गर्नुपर्ने माग राखे।
व्यवसायी समितिका अनुसार सडक कब्जा हुँदा बैंक, रेष्टुरेन्ट, दोहोरी, सुनचाँदी र अन्य व्यापारिक प्रतिष्ठान प्रभावित भएका छन्। समितिले प्रशासनसँग सार्वजनिक सडकमा कार्यक्रम गर्दा व्यापार प्रभावित नहोस् भन्ने कानुनी व्यवस्था लागू गर्न आग्रह गरेको छ।
पोखरा महानगरपालिकाका मेयर धनराज आचार्यले भने तीन पूर्वप्रधानमन्त्री आउँदै हुनुहुन्छ। यो देशको इतिहास र सम्मानको विषय हो। पार्टीले आयोजना गरिसकेको कार्यक्रम यहाँ भइरहेको छ। उनले बिदाको दिनबाहेक अन्य दिन व्यवसायीको माग बमोजिम कार्यक्रम पुनर्विचार गर्न सकिने बताए।
पोखरामा राजनीतिक सभा र व्यापारबीचको द्वन्द्वले स्थानीय व्यवसायी र राजनीतिक गतिविधि दुवैका लागि चुनौतीपूर्ण स्थिति सिर्जना गरेको छ।
