पोखरा । लागूऔषध ब्राउनसुगर ओसारपसार गरेको आरोपमा प्रहरीले पोखरामा दुई जनालाई पक्राउ गरेको छ।
गोप्य सूचनाका आधारमा जिल्ला प्रहरी कार्यालय कास्की र लागूऔषध नियन्त्रण ब्यूरो शाखा कार्यालय पोखराबाट खटिएको टोलीले पोखरा आउँदै गरेको हाइसको चेकजाँच गरेको थियो।
प्रहरी नायब उपरीक्षक हरीबहादुर बस्नेतका अनुसार पोखरा महानगरपालिका–९ पृथ्वीचोकमा रोकिएको ग १ ख ४४९९ नम्बरको हाइसमा सवार दुई यात्रुबाट ३.८९ ग्राम ब्राउनसुगरजस्तो देखिने पदार्थ बरामद भएको हो।
पक्राउ पर्नेमा पोखरा महानगरपालिका–३२ का ३७ वर्षीय बिनोद ढकाल र मकवानपुर हेटौंडा उपमहानगरपालिका–१२ सिक्रेनीका ३८ वर्षीय विकास लामा रहेका छन्।
प्रहरीका अनुसार उनीहरूलाई नियन्त्रणमा लिएर लागूऔषध मुद्दामा कास्की जिल्ला अदालतबाट १५ दिनको म्याद थप गरी अनुसन्धान अघि बढाइएको छ।
