पोखरा ।
खेलकुद ऊर्जा नेपालले पोखरा महानगरपालिका–२३, ठुलाखेतस्थित सिद्ध बराह माध्यमिक विद्यालयलाई विभिन्न खेलकुद सामग्री हस्तान्तरण गरेको छ।
विद्यालयमा आयोजित कार्यक्रममा फुटबल, भलिबल, बास्केटबल, कोन, ब्याडमिन्टन, स्किपिङ डोरी र भलिबलको जाली लगायत सामग्री हस्तान्तरण गरेको हो ।
खेलकुद ऊर्जा नेपालले नेदरल्यान्डकेा De Kracht van Sport को सहयोग तथा प्रतिनिधिको समन्वयमा पोखराका विभिन्न विद्यालयमा खेलकुद सामग्री वितरण गर्दै आएको छ। विद्यालय तहबाटै खेलकुद गतिविधिलाई प्रोत्साहन गर्ने र विद्यार्थीमा रहेको खेल प्रतिभा पहिचान तथा विकासमा सहयोग पुर्याउने उद्देश्यले अभियान सञ्चालन गरेकाे हो ।
कार्यक्रमका प्रमुख अतिथि पोखरा महानगरपालिका–२३ का अध्यक्ष रामकाजी गुरुङले खेलकुद सामग्री उपलब्ध भएपछि विद्यार्थीलाई नियमित अभ्यास गर्न सहज हुने बताए । विद्यालय तहबाटै खेल प्रतिभा पहिचान गरी त्यसलाई विकास गर्ने वातावरण बनाउन यस्ता कार्यक्रम उपयोगी हुने छ । उनले खेलकुद मनोरञ्जनको माध्यम मात्र नभई विद्यार्थीको शारीरिक तथा मानसिक विकास, अनुशासन, आत्मविश्वास र नेतृत्व क्षमता विकासमा समेत महत्वपूर्ण भूमिका खेल्ने बताए ।
कार्यक्रममा पत्रकार इन्द्रप्रसाद पौडेल, विद्यालयका प्रधानाध्यापक बद्रीनाथ पराजुली, खेलकुद ऊर्जा नेपालका प्रतिनिधि तथा नेदरल्यान्ड्सबाट आएका अतिथि ओस्कार लगायतले खेलकुदको महत्व र विद्यार्थीको प्रतिभा विकासका विषयमा धारणा राखेका थिए ।
विद्यालयका शिक्षक प्रेमप्रसाद पराजुलीले कार्यक्रम सञ्चालन गरेका थिए भने खेलकुद ऊर्जा नेपालका अध्यक्ष निराज अधिकारीको अध्यक्षतामा भएको कार्यक्रममा शिक्षक, विद्यार्थी, अभिभावक तथा स्थानीयको सहभागिता थियो ।
खेलकुद ऊर्जा नेपालले यसअघि पोखराका विभिन्न विद्यालयमा खेलकुद सामग्री वितरण गरिसकेको छ । संस्थाले आगामी दिनमा थप विद्यालयमा सामग्री उपलब्ध गराउँदै विद्यालयस्तरमा खेलकुद गतिविधिलाई विस्तार गर्ने जनाएको छ ।
विद्यालयले खेलकुद सामग्री प्राप्त भएपछि विद्यार्थीमा उत्साह बढेको जनाएको छ। उपलब्ध सामग्रीले नियमित अभ्यासका लागि सहज वातावरण बन्नुका साथै विद्यालयस्तरबाटै खेल प्रतिभा पहिचान र विकास गर्न सहयोग पुग्ने अपेक्षा गरेकाे छ।
